Paul Lendvai: Rama ka shkatërruar imazhin e tij të kultivuar me kujdes
Kur, më 24 tetor 1929, rrëzimi i Bursës së Nju-Jorkut tronditi ekonominë globale dhe bota u përfshi nga Depresioni i Madh, Paul Lendvai ishte vetëm dy muajsh. Tani, në moshën 97-vjeçare, ai është ende aktiv si autor librash dhe kolumnist i gazetës austriake „Der Standard“.
Ai është një dëshmitar i vërtetë i shekullit. Në vitet 1980, ishte ndër gazetarët e paktë perëndimorë të cilëve iu lejua të vizitonin Shqipërinë.
Në atë kohë, ai përgatiti disa kronika televizive për Shqipërinë dhe shkroi librin „Shqipëria e vetmuar. Reportazh nga vendi i shqiptarëve“.
Lendvai, i lindur në një familje hebraike në Budapest, i mbijetoi Holokaustit falë një pasaporte mbrojtëse zvicerane, të cilën ia kishte lëshuar në Budapest një diplomat zviceran.
Njëzet e nëntë anëtarë të familjes së Lendvait u ekzekutuan nga nazistët. Pas diktaturës naziste, pasoi komunizmi. Në vitin 1957, një vit pas shtypjes së Kryengritjes Popullore Hungareze nga sovjetikët, Lendvai u arratis drejt Austrisë.
Ai punoi si korrespondent për gazetën e njohur britanike „Financial Times“ dhe shkroi për gazeta zvicerane rreth zhvillimeve prapa Perdes së Hekurt.
Po ashtu, për 44 vjet me radhë, nga viti 1980 deri më 2024, ai drejtoi emisionin legjendar të televizionit austriak ORF, „Oststudio“, i cili më vonë u quajt „Europastudio“.
Në këtë emision, ai ka ftuar disa herë edhe personalitete të politikës shqiptare. Ndonëse në moshë të shtyrë, Lendvai ia kushton kolumnen e tij më të re zhvillimeve dramatike në Shqipëri.
Ai shkruan se, pothuajse në të njëjtën kohë me demonstratat masive në Francë, nga kryeqyteti shqiptar, Tirana, dhe qendra të tjera urbane u raportuan protesta kundër politikave të qeverisë.
Ashtu si katër muaj më parë, në rrugë dolën jo vetëm studentët, por edhe qytetarë të tjerë, për të kërkuar dorëheqjen e qeverisë së udhëhequr nga kryeministri socialist Edi Rama.
Lendvai thekson se, në atë rast, protestat ishin kundër një projekti turistik në një zonë të mbrojtur në jug të vendit. Pas projektit qëndron Jared Kushner, dhëndri i presidentit amerikan Donald Trump, transmeton Telegrafi.
Për projektin, vlera e të cilit llogaritet në 1,4 miliardë euro, Kushner mori statusin e lakmuar të „investitorit strategjik“, me mundësinë e përshpejtimit të procedurave të lejeve nga Ministria e Turizmit.
Ndryshe nga Franca, situata politike në Shqipëri nuk karakterizohet nga përçarja mes së djathtës ekstreme dhe së majtës ekstreme, por nga pushteti pothuajse absolut i qeverisë së Ramës, shkruan Lendvai.
Rama, i cili qeveris prej 13 vitesh, përbën një rast të veçantë në politikën evropiane. Piktori i talentuar jo vetëm që mban marrëdhënie të shkëlqyera me galeritë ndërkombëtare, por konsiderohet edhe i preferuari i redaktorëve të kulturës. Gjithmonë i gatshëm dhe i veshur në mënyrë të çlirët, ai paraqitet në intervista si një „politikan-artist“.
Ai u bë i njohur ndërkombëtarisht si kryetar i Bashkisë së Tiranës. Ndërkohë, sipas Lendvait, lulëzimi i ndërtimeve gjatë qeverisjes së Ramës i dha një shtysë të fuqishme korrupsionit të rrënjosur thellë në Shqipëri.
Për sistemin e klientelizmit që Rama ka ndërtuar ndër vite, vlen thënia e famshme e filozofit Lord Acton (1834–1902): „Pushteti korrupton, dhe pushteti absolut korrupton absolutisht“.
Demonstratat, të cilat vazhdojnë prej ditësh, drejtohen kundër qeverisë, jo vetëm për shkak të kushteve të këqija të studimit, por edhe për shkak të nepotizmit të përhapur, që lidhet me emrin e Ramës.
Në vend që të merrej me shkaqet e protestave të dhunshme, Rama lejoi policinë, e cila veproi brutalisht, të përdorte topat e ujit dhe gazin lotsjellës, kritikon Lendvai.
Në paraqitjet e tij publike, Rama akuzoi „duart e huaja“, të cilat, sipas tij, synojnë të pengojnë anëtarësimin e Shqipërisë në BE, se qëndrojnë pas demonstratave, pa paraqitur asnjë provë në mbështetje të këtyre pretendimeve.
Sipas Ramës, kjo është „vepër e së njëjtës dorë që e ka djegur dhe shkatërruar Shqipërinë më shumë se një herë“.
Duke kopjuar këtë retorikë të gënjeshtrave, të përdorur nga regjimet autoritare dhe diktatoriale, si dhe përmes arrestimit të qindra personave, 62-vjeçari Rama ka hequr maskën e tij. Kështu, duket se ai e ka shkatërruar përfundimisht imazhin e autsajderit, të cilin e kishte kultivuar me aq kujdes, pavarësisht çorapeve të kuqe që vesh me kostum, përfundon Lendvai në kolumnen e tij.
UDHËTO LIRË.
UDHËTO KOMOD.
Rezervo online shpejt, lehtë dhe pa stres.
